Основното јавно обвинителство – Велес ќе го истражува вчерашното разбојништво

Скопје, 09 Февруари 2016

Надлежниот јавен обвинител од Основното јавно обвинителство – Велес по вчерашното разбојништво во Велес во насока на утврдување на околностите на стореното кривично дело, донесе Наредба за спроведување на истражна постапка против двајца скопјани и еден велешанец кој е недостапен на органите на прогонот. Сите три лица се осомничени дека сториле кривично дело Разбојништво од чл.237 од Кривичниот законик, а на првоосомничениот му се става на товар и кривично дело – Недозволено изработување, држење, посредување и тргување со оружје и распрскувачки материи од чл.396 ст.1 од Кривичниот законик. Прочитај повеќе…

Наредена обдукција на телото на жена пронајдена почината во куќа во Прилеп

Скопје, 09 Февруари 2016

По пријава на соседите на сега почината, дека се шири неподнослива реа од куќа во нивна близина, надлежен јавен обвинител од Основното јавно обвинителство – Прилеп заедно со екипа од Министерството за внатрешни работи изврши увид. При увидот пронајден е женски труп во поодмината фаза на распаѓање. 49 годишната прилепчанка која во куќата живеела заедно со нејзиниот брат, според првичниот увид била подолго време почината.

По наредба на надлежниот јавен обвинител од Основното јавно обвинителство – Прилеп телото е предадено на обдукција. Обвинителството ги презема сите неопходни дејства за расветлување на причините за смртта и зошто настанот не е навремено пријавен. Јавниот обвинител го сослуша братот на починатата.

Истрагата продолжува во насока на утврдување на фактите.

Поведена постапка за производство и дистрибуција на детска порнографија

Скопје, 08 Февруари 2016

Основното јавно обвинителство – Струмица донесе Наредба за спроведување истражна постапка против едно лице поради основано сомнение за сторено кривично дело – Производство и дистрибуција на детска порнограгфија од чл. 193-а ст.3 во врска со ст. 1 од Кривичниот законик. Прочитај повеќе…

Осомничени повеќе лица за случајот со Тамара Димовска од Велес

Скопје, 08 Февруари 2016

Основното јавно обвинителство – Скопје ја известува јавноста дека во врска со настанот што обвинителството го оформи по допрен глас за случајот на Тамара Димовска од Велес, спроведе низа на дејствија.

Од преземените дејствија произлезе дека како осомничени се јавуваат повеќе лица за сторено кривично дело – Несовесно работење во службата од чл. 353 -в од Кривичниот законик. Во својство на осомничени, лицата се повикани да дадат изјави пред надлежниот јавен обвинител. Истрагата продолжува во насока на целосно расветлување на случајот.

По завршување на сослушувањето ќе биде донесена мериторна јавно обвинителска одлука за која јавноста ќе биде навремено известена.

Поднесен обвинителен акт против напаѓачите во Одделението за дигестивна хирургија

Скопје, 05 Февруари 2016

Основното јавно обвинителство -Скопје по спроведената истражна постапка и прибирање на сите докази, денеска до надлежниот Основен суд Скопје 1 -Скопје поднесе обвинителен акт со предлог за продолжување на мерка – Притвор против едно лице за сторени кривични дела Убиство од чл.123 ст.1 в.в. со чл.19 од Кривичниот законик, Неовластено изработување, држење, посредување и тргување со оружје или распрскувачки материи од 396 ст.1 и Насилство од чл.386 ст.3 в.в со ст.1 од Кривичниот законик.

Поднесен е и обвинителен предлог против друго лице кое учествувало во настанот за кривично дело – Напад врз службено лице при вршење работи од безбедноста од чл.383 ст.2 в.в со ст.1 од Кривичниот законик. Против ова лице претходно се определени мерки на претпазливост – забрана за напуштање на територија на Град Скопје, обврска обвинетиот да се јавува повремено на службено лице во Основниот суд Скопје 1 – Скопје и привремено одземања на патна исправа.

Настанот за кој се обвинети лицата се случи на деветти ноември минатата година во Клиничкиот центар „Мајка Тереза“ – Скопје, во Одделението за дигестивна хирургија, кога во лекарската соба беше пукано на доктор – хирург што претходно оперирал пациентка и истата починала. Прво обвинетиот со огнено оружје – пиштол испукал седум проектили при што на докторот му нанел три прострелни рани во пределот на левата нога. Во настанот биле загрозени и други вработени лица во болницата, како и едно лице од обезбедувањето на Клиниката, а бил оштетен и инвентар на Одделението.

Основното јавно обвинителство за гонење на организиран криминал и корупција поднесе обвинение против службено лице од МВР

Скопје, 05 Февруари 2016

По поднесена кривична пријава од Министерството за внатрешни работи против едно лице вработено во МВР, а за сторено кривично дело – Незаконито влијание врз сведоци, Основното јавно обвинителство за гонење на организиран криминал и корупција ги презеде сите потребни дејствија за утврдување на фактите во предметот.

Притоа е утврдено дека постои основано сомнение дека осомничениот го сторил кривичното дело што му се става на товар, односно дека со нудење поткуп влијаел на едно лице, а со цел лицето да се појави како сведок во постапка пред суд и да даде исказ во определена насока.

Денеска надлежниот обвинител, по завршување на постапката и целосно расветлување на настанот, до надлежниот Основен суд Скопје 1 – Скопје поднесе Обвинителен предлог против обвинетиот за сторено кривично дело – Незаконито влијание врз сведоци од член 368- а, ст. 1 од Кривичниот законик.

Основното јавно обвинителство – Велес поднесе обвинение против Градоначалникот на Општина Чашка

Скопје, 29 Јануари 2016

Обвинетото лице се гони за сторено кривично дело Злоупотреба на службената положба и овластување од чл.353 ст.3 в.в ст.1 од Кривичниот законик.

Имено, Основното јавно обвинителство – Велес утврди дека во временскиот период од 02.09.2011 год.до 30.04.2013 год.во својство на службено лице – Градоначалник на Општина Чашка, со искористување на својата службена положба и овластување, прибавил значителна имотна корист за Општина Чашка во вкупен износ од 4.058.566,00 денари, а на штета на оштетеното здружение Планинарско спортски клуб ”Солунска глава”- Велес.

Постапувајќи спротивно на одредбата од чл.5 ст.1 од Законот за утврдување на правен статус на бесправно изградени објекти, осомничениот иако знаел дека Општина Чашка никогаш не била корисник ниту имател на планинарскиот дом Чеплес, на ден 02.09.2011 год. до Комисијата за легализација, од име на Општина Чашка, поднел барање за утврдување на правен статус на бесправно изграден објект – планинарски дом. Исто така, спротивно на условите од чл.6 ст.2 ал.2 од Законот за утврдување на правен статус на бесправно изградени објекти, иако бесправниот објект имал инфраструктурни приклучоци, но општината не поседувала доказ за тоа, ниту сметки за платени комуналии,како овластено лице – Градоначалник на општина Чашка, приложил Изјава заверена на нотар дека објектот планинарски дом Чеплес е изграден до влегувањето во сила на Законот.

По спроведената постапка од Комисијата за легализација на општина Чашка на ден 30.04.2013 год.потпишал Решение за утврдување на правен статус на бесправен објект – планинарски дом за КО Папрадиште, врз основа на кое е извршено запишување на правото на сопственост на Општина Чашка врз планинарскиот дом, кој по донесена Одлука за оттуѓување на Советот на општина Чашка од 03.06.2013 год.е продаден на лицето Љубчо Ѓорѓиев од Велес за сума од 4.058.566,00 ден.

Основното јавно обвинителство – Скопје гони вработен во КПУ Идризово

Скопје, 29 Јануари 2016

Основното јавно обвинителство – Скопје поведе постапка против едно лице кое се гони за сторено кривично дело Неовластено производство и пуштање во промет на наркотични дроги, психотропни супстанции и прекурсори од чл.215 и Недозволено изработување, држење и тргување со оружје или распрскувачки материи од чл.396 од Кривичниот законик.

На 28.01.2016 година при редовна контрола и личен претрес на лицето вработено како надзорник во КПУ Идризово, во неговите лични работи пронајдено е топчесто пакување налепено со селотејп трака за кое при вештачењето е утврдено дека се работи за марихуана. При извршениот претрес во домот на осомничениот покрај количество на марихуана, пронајдени се и 9 парчиња на муниција.

Надлежниот јавен обвинител од Основното јавно обвинителство – Скопје издаде Наредба за поведување на истражна постапка и до судијата на претходна постапка достави Предлог за определување на мерка Притвор. Предлогот е прифатен и со Решение на осомничениот му е определена мерка притвор во траење од 30 дена.

Екстрадиран македонски државјанин осомничен за настаните во „Диво Насеље“

Скопје, 15 Јануари 2016

Денеска од Република Србија е екстрадиран македонски државјанин oсомничен за сторени кривични дела „Терористичка организација” од чл. 394-а и „Тероризам” од чл. 394-б од Кривичниот законик поврзани со настаните во „Диво Насеље“.

Имено, кон крајот на октомври минатата година, Основното јавно обвинителство за гонење на организиран криминал и корупција ја прошири истрагата во врска со кумановските настани од 9 и 10 мај 2015 година. Врз основа на прибраните докази во текот на истражната постапка​, надлежниот јавен обвинител имаше издадено Наредба за спроведување на истражна постапка​ за уште тројца македонски државјани што во тој момент беа недостапни на органите на прогонот.

Основното јавно обвинителство Скопје ја прошири истрагата за убиството на деветнаесетгодишникот кај Бит пазар

Скопје, 12 Јануари 2016

По сознанијата од Министерството за внатрешни работи дека во полициска станица пристапиле две лица, од кои еден малолетник, кои се пријавиле како извршители на кривично дело, надлежниот јавен обвинител од Основното јавно обвинителство – Скопје издаде Наредба за препознавање. На извршеното препознавање еден од оштетените ги препознал пријавените како сторители на кривичното дело во кое животот го загуби 19-годишно лице. Прочитај повеќе…

Page 1 of 2312345...1020...Last »